Tuesday , October 16 2018
Breaking News

बिगर बासमती तांदळाच्या किमतीत वाढ

आधारभूत किमतीत वाढ; परदेशातील निर्यातीवर परिणाम होण्याची भीती

पुणे : आधारभूत किमतीत केंद्र सरकारने वाढ केल्याने बिगर बासमती तांदळाच्या किमतीत वाढ झाली असून त्याचा फटका आता परदेशातील निर्यातीवर होण्याची भीती व्यक्त होत आहे. थायलंड, व्हिएतनाम देशाच्या तुलनेत भारतातील बिगर बासमती तांदळाची किंमत अधिक असल्यास देशातील तांदळाची निर्यात कमी होण्याची शक्यता नाकारता येत नाही. त्यामुळे या संदर्भात केंद्र सरकारने उपाययोजना करण्याची मागणी जोर धरू लागली आहे.

गेल्या तीन वर्षांत भारतातून बासमती तसेच बिगर बासमती तांदळाची परदेशात सर्वाधिक निर्यात होत असून त्यात देश पहिल्या क्रमांकावर आहे. जगात तांदळाची सर्वाधिक निर्यात करणार्‍या थायलंड, व्हिएतनाम येथील तांदळाच्या निर्यातीपेक्षाही भारताची निर्यात जास्त आहे. बेनीन, आयव्हरी कोस्ट, गयाना, सेनेगल, तसेच आफ्रिकी देशांमधून तांदळाची वाढती मागणी होते. थायलंड तांदळाच्या तुलनेत देशातील बिगर बासमती तांदळाचे दर कमी असल्याने नेपाळ आणि बांगलादेश या शेजारील राष्ट्रांमधून बिगर बासमती तांदळाला अधिक मागणी होत आहे. त्यामुळे अमेरिका, युरोपियन देशातूनही बिगर बासमती तांदळाला मागणी असते.

भारतात 2016 ते 2017 च्या तुलनेत तांदळाची निर्यात 18 टक्क्यांनी वाढली आहे. मागील वर्षाच्या 107 लाख टनाच्या तुलनेत 2017 ते 2018 मध्ये ही निर्यात 127 लाख टन इतकी झाली. त्यात बिगर बासमती तांदळाचा वाटा अधिक होता. बिगर बासमती तांदळाच्या निर्यातीची टक्केवारी मागील वर्षाच्या तुलनेत 30 टक्क्यांनी वाढली आहे. परंतु, केंद्र सरकारने तांदळाच्या आधारभूत किंमतीत 11 ते 13 टक्क्यांनी वाढ केली. बांगलादेशाने 28 टक्के आयातकर लावला. त्यामुळे बिगर बासमती तांदळाच्या दरात वाढ झाली असून त्याचा परिणाम निर्यातीवर होईल, अशी भीती तांदळाचे व्यापारी राजेश शहा यांनी व्यक्त केली.

पश्‍चिम आशियातील आखाती देशांमधील बासमती तांदळाला अधिक मागणी असते. भारताची बासमती तांदळाची ही सर्वात मोठी बाजारपेठ आहे. तसेच इराण, इराक, सौदी अरेबिया, संयुक्त अरब अमिराती या आखाती देशांनाही सर्वाधिक निर्यात होते. इराणने यावर्षी बासमती तांदळाची आयात वाढवली आहे. युरोपियन महासंघातील देश व अमेरिका मागील काही वर्षांच्या तुलनेत जास्त बासमती तांदूळ खरेदी करीत आहेत, असेही शहा यांनी सांगितले.

11 ते 13 टक्क्यांनी वाढ
सध्या बांगलादेशात 28 टक्के आयातकर लागू केला आहे. त्यात आधारभूत किमतीत 11 ते 13 टक्क्यांनी वाढ झाली आहे. त्यामुळे बिगर बासमती तांदळाची निर्यात कमी होऊ शकते. आतापासून त्याबाबत उपाययोजना केल्यास त्याचा फटका बसणार नाही. व्हिएतनाम, थायलंड येथील दर आपल्यापेक्षा कमी असल्यास त्यांची निर्यात अधिक होऊन भारतीय तांदळाच्या निर्यातीवर परिणाम होईल. बिगर बासमती तांदळाची दोन वर्षांत 87 लाख टन तर बासमती तांदळाची 35 ते 40 लाख टन निर्यात झाली होती, अशी माहिती शहा यांनी दिली.

About Mahadev Gore

हे देखील वाचा

पश्चिम बंगालमध्ये बस नदीत कोसळल्याने सहा प्रवाशी ठार

कोलकाता- पश्चिम बंगालमधील हुगळी येथे प्रवाशांनी भरलेली एक बस कालव्यात कोसळून ६ ठार तर २० …

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

error: Content is protected !!