नवी दिल्ली: मनसे अध्यक्ष राज ठाकरे सध्या संपूर्ण राज्यात भाजप विरोधात सभा घेत आहे. मोदी-शहा या जोडगोळीला दूर करण्यासाठी राज ठाकरे मतदारांना आवाहन करत आहे. सध्या राज ठाकरेंच्या सभांची देशभरात चर्चा आहे. ‘ए लाव रे तो व्हिडिओ’ आणि ‘आणा रे त्याला’ अशा शब्दप्रयोगाने सभा गाजवत भाजपची कोंडी राज ठाकरे करत आहे. दरम्यान राज ठाकरे यांच्यावर भारतीय जनता पक्षाने पलटवार करण्याचा प्रयत्न सुरु केला आहे. राज यांनी मुंबईतील सभेत दाखवलेला चिले कुटुंबाचा फोटो सध्या चर्चेचा विषय बनला आहे. याची दखल घेत हा फोटो भारतीय जनता पक्ष किंवा सरकारच्या अधिकृत जाहिरातीमधील नाही, तसेच तो कोणत्याही अधिकृत वेबसाइटवर प्रसिद्ध झालेला नाही, असे शिक्षणमंत्री विनोद तावडे यांनी स्पष्ट केले आहे. मात्र, अशा प्रकारे फोटो वापरणे चुकीचे आहे असेही तावडे म्हणाले. हे स्पष्टीकरण देताना तावडे यांनी राज यांच्यावर टीकास्त्र सोडले.
‘एखाद्या मोदीप्रेमीने तो सोशल मीडियावर पोस्ट केलेला असू शकतो. अशा पद्धतीने जाहिरातीत फोटो वापरल्याचे आमच्या लक्षात आले हे चिले कुटुंबातील सदस्यांनीच स्वत:हून सांगितले आहे. त्या मुळे यात राज ठाकरे यांनी काहीही शोधून काढलेले नाही, त्यांनी तसा आव आणू नये असा टोलाही तावडे यांनी लगावला. राज यांनी आपल्या सभांमधून आता शिवसेनेलाही मतदान करू नका असे सांगायला सुरुवात केली आहे, असे सांगत राज यांनी गेले दोन दिवस घेतलेल्या गॅपमध्ये डीलिंग करून हे नवे अडिशन टाकले असावे असा आरोपही तावडे यांनी राज यांच्यावर केला आहे.
स्टँडअप कॉमेडी सुरु ठेवावी
राज ठाकरेंनी आता २७ एप्रिलनंतरही आपल्या सभा सुरूच ठेवाव्यात. याचे कारण म्हणजे त्यांच्या टुरिंग टॉकीजमुळे लोकांची चांगलीच करमणूक होऊ लागली आहे. तसेही ते निवडणुका लढवत नसल्याने ही स्टँडअप कॉमेडी सुरू ठेवायला काही हरकत नाही, अशा शब्दांत तावडे यांनी राज यांना कोपरखळ्या मारल्या.
