भावीकांची दर्शनासाठी अलोट गर्दी
अमळनेर – संत सखाराम महाराज यांचा द्वितीय शताब्दी महोत्सव साजरा झाल्यानंतर अमळनेरला आज निघालेला पालखी सोहळा भाविकांच्या डोळ्यांचे पारणे फेडणारा ठरला. यावेळी अमळनेर नगरी संत सखाराम महाराजांच्या जयघोषाने दुमदुमली होती. पालखीचे दर्शन घेण्यासाठी भाविकांनी अलोट गर्दी केली होती.
अमळनेर येथे निघालेल्या पालखी सोहळ्याचे महत्त्वाचे वैशिष्ट्य म्हणजे संत सखाराम महाराजांची भव्य मूर्ती प्रतिमा दिसत होती. परमपूज्य संत सखाराम महाराज संस्थानचे वंशज अधिकारी विद्यमान सत्पुरुष प्रसाद महाराज यांचे अनेक महिला व पुरुषांनी दर्शन घेतले. वाडी संस्थानपासून अत्यंत शिस्तबद्ध पद्धतीने मिरवणूक व पालखी उत्सव कीर्तनाचे स्वरात निघत होती. त्यात पालखीच्या पुढे दिंडी, भजनी मंडळ यांची पथके होती. पालखीच्या मागे मेणा असतो. त्यात सखाराम महाराज यांच्या पादुका असतात. त्यांना देखील स्पर्श करीत भाविक तृप्त होत होते. संत सखाराम महाराज यात्रा उत्सव वैशाख शुद्ध एकादशीचा उत्सव वैशाख शुद्ध १५ चा पालखी उत्सव या काळात पंढरीच्या पांडुरंगाचे अस्तित्व पंढरपूर येथे असते,असे भाविक समजतात. म्हणून यावेळी अनेक दिंड्या अमळनेरची वाट धरतात. वारकरी संप्रदायाचा पालखी उत्सव महाराष्ट्रात प्रसिद्ध आहेत. त्यात तुकोबा ज्ञानेश्वर माऊलींच्या पालखीचा प्रति पंढरपूरच्या दिशेने होणारा प्रवास भाविक नजरेत साठवून तृप्त होतो. या पालखी सोहळ्याची दिंडी असते. एक वीणावादक असतो त्याचे नियंत्रण दिंडीचे कामकाज चालते. दिंडीच्या मागे पालखी व त्या संताच्या पादुका मुखवटे असतात.
यांनी घेतले परीश्रम
संत सखाराम महाराज पालखी सोहळ्यात शिस्तबद्द होण्यासाठी अमळनेर तालुक्याचे डीवायएसपी राजेंद्र ससाने, पोलीस निरीक्षक अनिल बडगुजर व त्यांचे कर्मचारी व पोलिस पाटील संघटनेचे उल्हास लांडगे, रवींद्र पाटील, संजय पाटील, विजय पाटील, छोटू भिल, भगवान पाटील, भानुदास पाटील यांनी चोख बंदोबस्त ठेवला. संत सखाराम महाराज पालखी उत्सवात वाजत गाजत या पालखी सोहळ्यामध्ये अमळनेर तालुक्यातील अनेक भाविक महिलांनी दर्शन घेतले.
