पालघर : पालघर लोकसभा पोटनिवडणुकीबाबत राजकीय हालचालींना वेग आला आहे. एकीकडे शिवसेनेने दिवंगत खासदार चिंतामण वानगा यांच्या मुलाला उमेदवारी दिली आहे, तर दुसरीकडे भाजपचा अजून उमेदवारही निश्चित होताना दिसत नाही. श्रीनिवास वानगा यांना शिवसेनेने उमेदवारी दिली आहे. फोडाफोडीचं राजकारण होऊ नये म्हणून शिवसेनेनं श्रीनिवास वनगांना अज्ञातस्थळी ठेवलं आहे. श्रीनिवास वानगा आज शिवसेनेकडून उमेदवारी अर्ज भरणार आहेत.
पालघर लोकसभा पोटनिवडणूक भाजपसाठी प्रतिष्ठेची बनली आहे. कारण चिंतामण वानगा हे भाजपकडून खासदार होते. मात्र भाजपच्या दुर्लक्षामुळे चिंतामण वानगाचे पुत्र श्रीनिवास यांनी मनगटाला शिवबंधन बांधून घेतलं. त्यानंतर भाजपला जाग आली आणि धावपळ सुरु झाली. शिवसेनेच्या फोडाफोडीच्या राजकारणामुळे भाजपची मोठी कोंडी झाली आहे.
‘वर्षा’वर चर्चा
पालघर पोटनिवडणुकीत उमेदवार निश्चितीवरुन भाजपमध्ये मोठा संभ्रम पाहायला मिळतो आहे. पालघरचे पालकमंत्री विष्णू सावरा, आमदार पासकल धानोरा, मनीषा चौधरी आणि स्थानिक पदाधिकारी हे काल मुख्यमंत्र्यांच्या भेटीला गेले होते. 10 मे रोजी भाजपचा उमेदवार अर्ज भरेल, असे बैठकीत ठरले. मात्र उमेदवाराच्या नावावर निर्णय झाला नाही. उमेदवार निश्चित करण्याचा सर्वाधिकार मुख्यमंत्र्यांना देण्यात आला आहे. जो उमेदवार मुख्यमंत्री निवडतील, त्याला निवडून आणण्याचा ठराव पालघरमधील भाजप पदाधिकाऱ्यांनी एकमताने केला आहे.
दानवे आज पालघरला
भाजपचे प्रदेशाध्यक्ष रावसाहेब दानवे आज पालघरमध्ये असणार आहेत. त्यामुळे ते तिथे काय हालचाली करतील, याकडेही सर्वांचे लक्ष लागून राहिले आहे. कारण आज दानवे पालघरमध्ये आहेत आणि दुसरीकडे आजच शिवसेनेकडून श्रीनिवास वानगा अर्ज दाखल करणार आहेत.
कॉंग्रेसचे गावित भाजपच्या वाटेवर?
कॉंग्रेसचे माजी राज्यमंत्री राजेंद्र गावित हे ते भाजपच्या वाटेवर असल्याची चर्चा सुरु आहे. चिंतामण वानगा यांच्या निधानाने पालघर लोकसभा मतदारसंघात पोटनिवडणूक होत आहे. पोटनिवडणुकीसाठी आतापर्यंत 18 उमेदवारांनी अर्ज घेतला आहे. पालघर आणि भंडारा गोंदिया लोकसभा मतदारसंघासाठी 28 मे रोजी पोटनिवडणूक होत असून 31 मे रोजी मतमोजणी होणार आहे.
