नवी दिल्ली: नुकत्याच झालेल्या लोकसभा निवडणुकीमध्ये भाजप आणि एनडीएला भरघोस विजय मिळाला. भाजपाच्या नेतृत्वाखालील एनडीएने जबरदस्त कामगिरी करत निर्विवाद बहुमत मिळविले आहे. दरम्यान एनडीएचा विस्तार होऊन भाजपाला अजून एक मित्रपक्ष मिळण्याची शक्यता आहे. आंध्र प्रदेशमध्ये चंद्राबाबू नायडूंच्या टीडीपीचा दारुण पराभव करून विधानसभा आणि लोकसभा निवडणुकीत दणदणीत विजय मिळवणाऱ्या वायएसआर काँग्रेसचे नेते जगनमोहन रेड्डी यांनी आज नरेंद्र मोदी आणि अमित शहा यांची भेट घेतली आहे. पंतप्रधान नरेंद्र मोदींच्या घेतलेल्या भेटीवेळी जगनमोहन रेड्डी यांनी आंध्र प्रदेशमधील विविध विकासकामांविषयी मोदींसोबत चर्चा केली. तसेच आंध्र प्रदेशला विशेष राज्याचा दर्जा देण्याचा मागणीचा पुनरुच्चार केला.
लोकसभा निवडणुकीत भाजपाने स्वबळावर 303 जागा जिंकल्या. तर एनडीएला 353 जागा मिळाल्या आहेत. दरम्यान, लोकसभेमध्ये भक्कम बहुमत पाठीशी असलेल्या एनडीएचा अजून विस्तार होण्याची शक्यता आहे. वायएसआर काँग्रेसला विधानसभा निवडणुकीत 175 पैकी 151 तर लोकसभा निवडणुकीत 25 पैकी 22 जागा मिळाल्या आहेत.
